Жалезнае мастацтва Яна Перагінца
З творчасцю Яна Перагінца, майстра мастацкай коўкі, я пазнаёмілася ў Фэйсбуку. Асабліва зачапіў вока каваны краявід – гарадзенская вулачка, пажарная вежа. Захацелася сустрэцца з кавалём і ўбачыць творы, патрымаць у руках незвычайныя вырабы.
Мы
дамовіліся сустрэцца ў гарадской майстэрні Яна, якая знаходзіцца ў прыватным
сектары. Падыходзячы да прызначанага месца, я ўбачыла нейкі дзіўны аб’ект.
Падумалася: “Так, тут працуе майстар!”
Ян адчыняе веснічкі, і мы праходзім у глыб падворка.
Сцежка скончылася перад невялічкім збудаваннем. Працоўня выглядае маленькай, але
вельмі …насычанай і багатай. Паўсюль стаяць, ляжаць, вісяць творы майстра. Недзе
з цёмнага закутка выглядае каваны кот. Рыбіны пабліскваюць вачыма і нясуць на сваіх
хрыбтах дамкі … Бы казачны куфэрак, напоўнены незвычайнамі скарбамі.
Кавальствам Ян займаецца з 2004 года,
калі паступіў у Гарадзенскі ўніверсітэт імя Янкі Купалы на мастацкае адзяленне.
-Вучыўся
завочна, час быў, таму адначасова пайшоў вучыцца ў майстэрню да каваля Юрыя
Круша. Гэта мой першы настаўнік. Там, канешне, і калектыў важны. Адзін у аднаго
вучацца, старэйшыя маладзейшым паказваюць. Калі тэхнічна ўнік, то ўжо з
мастацкага боку пачаў далучацца. Эскізы рабіў, каб чыюсьці ідэю намаляваць. А
потым ужо свае праекты рабіў: спачатку малюеш, а потым куеш. Адначасова вучыўся
і кавальствам займаўся, таму яно ў мяне мастацкае.
Матэрыялы бяруцца адусюль.
-Усё, што
знаходзіцца вакол - гэта не я прыдумаў.
Замкі, жалезкі розныя – будучыя мастацкія творы. Вось, напрыклад, як рыдлёўка пераўтвараецца ў рыбу : грабелькі
- хвост, падкова і ржавыя цвікі –плаўнікі. Хтосьці гэта выкінуў, для кагосьці
гэта смецце ўжо было. А я ўзяў і перарабіў,
- Ян паказвае рудую рыбіну, дэталі якой яўна пабачылі жыццё.
Шчупак зроблены
з замкоў… аб’яднаў іх да купы, дадаў трохі дэталяў, і ў дадатак функцыянальнае прызначэнне.
Маю ўвагу прыцягнулі каваныя рыбіны з каляровым
шклом. Аказваецца, гэта свяцільня. Майстар падлучыў святло, і рыбы засвяціліся.
Тут вітражнае шкло
выкарыстана, але вітраж не ў класічнай тэхніцы. Асягнуць усе тэхнікі для аднаго
майстра - гэта складана. Людзі цікавяцца, часам замаўляюць нешта асаблівае. Бывае,
што бачаць ужо гатовае і забіраюць. Рыбак,
і коцікаў, і анёлкаў, тыя ж машынкі і матацыклы. Калісьці нават зрабіў метровага
анёла, які выстаўляўся “У майстра”.
А гэта тыя самыя “самагоншчыкі”? Дзіўлюся
і бяру ў руку маленькага жалезнага чалавечка, што цягне бідон. Самагоншчыкамі
іх празвалі каментатары у Фэйсбук. Там я гэты цуд упершыню і пабачыла.
-Хлопец прынёс
на працу такія штукі, кажа, што металалом, нікому не патрэбны. Я не адразу
зразумеў, што гэта такое. Аказалася, гэта хлапушкі, якія працуюць ад газы.
Узяў, прыгледзеўся…можна было б і самавар маленькі зрабіць. Але гэта кітайская
вынаходка, якую падхапілі расейцы. А самагоншчыкі – гэта нешта палескае,
беларуска-ўкраінскае. Агулам, такая мужчынская тэма. Падстаўку зрабіць - і гатова. - Ян дастае з шуфляды аловак, устаўляе ў
бідоньчык і дадае: - Функцыянальна.
Твае рамесніцкія творы можна знайсці ў
адмысловых крамах: Цудоўні, Ткалі, Лёлі. Але мала хто ведае, што металічны вазок, які ўсталяваны на вуліцы
Тэльмана, - праца тваіх рук.
-Гэты праект быў
зроблены па ініцыятыве гарадской камунальнай службы. Звярнуліся праз цэнтар рамёстваў “Спадчына”. У
горадзе некалькі аб’ектаў па матывах кінастужак, якія здымаліся у Гродна –
вазок з “Белых росаў”, клетка з птушкай, гітара –“Мы родам з дзяцінства”, у
якім Ул. Высоцкі здымаўся .
Усе працы
выконвалі розныя майстры. Я
працаваў менавіта над вазком. Шукаў такую самую мадэль. Вельмі цяжка было
адшукаць, але атрымалася. Скапіяваў цалкам усю сістэму, каб было натуральнае
падабенства. Адзінае, што спіцы ў
арыгінале каля 3 міліметраў, а я зрабіў 5-6: такі антывандальны варыянт, каб не
пагнуліся, не паламаліся Вазок яшчэ і хістаецца.
...і рыпіць
-ну так, рыпіць, – усміхаецца
Ян. – Гэта ж жалеза.
Якія твае адчуванні, калі ты бычыш сваю працу на вуліцы? А водгукі гараджан, знаёмых?
-Дык
ніхто
і не ведае, хто гэта зрабіў. Нідзе не напісана. Проста ёсць аб’ект, інфармацыя, з якога фільма. Нядрэнна будзе, калі пазначаць аўтара. Але
кляймо на самім вазку я паставіў (кляймо
– аўтарскі знак майстра).
А як ты ставішся да тых аб’ектаў ,сметніц, якія ў горадзе з’явіліся?
-Адмоўна, як і
ўсе. Стаіць цэлы ДЖЭНТЭЛЬМЭН, з мятлікам, у капелюшы, з кійком…І яшчэ ДАМА з
сабачкам. У іх пляваць, смецце кідаць – ну так атрымліваецца! (Ян не хавае абурэння)
Ці ёсць у цябе нейкія свае ідэі,
прапановы для горада, нейкія мастацкія аб’екты, якія хочацца рэалізаваць?
-Хачу, але не
магу. Мы з кавалямі год пяць таму планавалі зрабіць фестываль “Жалезны кужаль”.
Звярнуліся да ўлад, нам сказалі: ”Давайце, запрашайце з Польшчы , з Літвы, з
Беларусі. Мы зробім на 5 дзён базу, начлег, харчаванне”. А потым паступова, паступова
дайшло да таго, што мы самі запрапанавалі і свой метал, і свой вугаль, толькі
дайце нам месца. Былі размовы, каб заплаціць майстрам за майстар-класы і за ўдзел
у плэнэры. Гэта нармальная практыка, калі майстры пакідаюць свае плэнэрныя
творы і атрымліваюць грошы. Мы прасілі, хоць прагадуйце
нашых гасцей гэтыя дні.І напрыканцы выявілася, што ні нашто грошай няма, і
замест пяці-сямі дзён – толькі адзін дзень незразумелага плэнэру. А быў
сур’ёзны праект, які ўсім спадабаўся. Была тэма “Кветка”, бо прымеркавана да
Фестывалю Нацыянальных Культур, мелася паўстаць скульптура каваная. Ну, і на
гэтым скончылася.
…напэўна каб бясплатна і сам усё
прынёс
…
-Не, нават так не ўсталююць. Затое сметніцы самі па
сабе выраслі, як грыбы…І ніхто не забараніў, не прасачыў.
Вось цікава, а як у цябе дома? Ты-“ сапожник без сапог”?
-У мяне ўсё
ёсць! Ад самай драбязы – вешалкі, кручочкі - усё маё, каванае. Бо гэтыя
крамныя, можа, і прыгожыя, але нетрывалыя, трохі больш нагрузкі - і ўжо ламаецца.
Зэдлікі каваныя, цэлы набор: розныя па форме і аздобе, не гнуцца, не ламаюцца.
Толькі абшыўку сядушкі мяняем, астатняе нават не падфарбоўваю. Метал трохі дзе-нідзе
працёрся, блішчыць – гэта ж натуральна.
Будзеш удзельнічаць у “Казюках”(традыцыйны
кірмаш з нагоды свята Св. Казіміра - 4 сакавіка, у якім удзельнічаюць рамеснікі,
ладзяцца святочныя забавы)?
Так, кожны год
удзельнічаю. Будзем з іншымі кавалямі на
плошчы Савецкай стаяць. Агонь, горны сапраўдныя. У аднаго хлопца нажны горн,
якому больш за 100 гадоў. У мяне ручны і трохі маладзейшы. Для людзей гэта
вельмі цікава. Нехта ўвогуле не бачыў такога, як метал становіцца мяккі як
пластылін, робіш з яго ўсё, што хочаш. І паглядзець, як майстар працуе, самому
паспрабаваць.
Комментарии
Отправить комментарий